UDGDT | Uniun da giuventetgna Danis-Tavanasa

A. INTENT

 

Art. 1

Gl’intent dall’uniun da giuventetgna ei:

  1. Promover l’unitad denter la giuventetgna.

  2. Promover la scolaziun e cultivaziun dil lungatg, dalla cultura e dils usits.

  3. L’uniun da giuventetgna da Danis-Tavanasa ei autonoma, secapescha denton era sco rom dalla giuventetgna dalla Cadi.

 

B. COMMEMBERS

 

Art. 2

Commember sa mintga giuvna e giuven daventar sil pli baul egl onn ch’ella/ch’el banduna la scola, quei entras pagar la contribuziun annuala. Entradas in temps pli tard ein era pusseivlas.

 

Art. 3

L’uniun consista ord la giuventetgna ledia tochen 35 onns dil vischinadi da Danis-Tavanasa, seigien els burgheis ni domiziliai.

 

Art. 4

Entrada en l’uniun

  1. L’entrada en l’uniun ei valeivla aschilunsch che las remarcas sut Art. 2 vegnan contonschidas.

  2. L’entrada en l’uniun ei valeivla aschilunsch ch’ella vegn approbada dalla radunonza generala.

  3. Mintga commember ei obligaus da collaborar cun l’uniun e cun la suprastonza.

 

Art. 4a

Commembers passivs

Commembers che han vargentau il 28-avel onn da naschientscha, han la pusseivladad da daventar commember passiv. Per commembers passivs vala Art. 24 e Art. 24a dallas statutas buc. Els han vinavon il dretg sin:

  1. in tschupi da nozzas

  2. in tschupi en cass da mortori

  3. che il bandierel porta la bandiera en cass da mortori

  4. participaziun alla sera da passivs

Art. 5

Extrada dall’uniun

  1. Entras avisar a scret sia extrada alla suprastonza sa mintga commember extrar da tut temps dall’uniun. El piarda tuts dretgs da quella. L’extrada deliberescha denton buca el d’eventualas obligaziuns e da deivets pendents.

  2. Entras la maridaglia s’extrescha mintga commember dall’uniun.

  3. La suprastonza sco era la radunonza generala ha il dretg da sclauder scadin commember che ademplescha buca sias obligaziuns.

  4. Commembers che pagan buca lur taxa annuala suenter ch’els ein vegni avisai duas gadas dalla suprastonza vegnan sclaus dall’uniun immediat.

C. ORGANISAZIUN

 

Art. 6

Ils organs dall’uniun ein:

  1. La radunonza generala

  2. La suprastonza

  3. Ils revisurs da quen

 

Art. 7

La radunonza generala ei il suprem organ dall’uniun. Ella ha liug annualmein entuorn il temps da Nadal. Ella ei obligatorica per mintga commember. 

 

Las tractandas statutarias secloman:

  1. Appel

  2. Nominaziun da dus dumbravuschs

  3. Prelecziun ed approbaziun dil protocol

  4. Rapport presidial

  5. Rendaquen e rapport dils revisurs

  6. Recepziun da novs commembers

  7. Elecziun e demissiuns

  8. Program da lavur

  9. Varia

 

Art. 8

Radunonzas generalas extraordinarias san vegnir clamadas da tut temps, sin conclus dalla suprastonza ni sche 1/3 dils commembers giavischan quei.

 

Art. 9

La radunonza generala ei habla da prender conclus entras la participaziun da 1/5 dils commembers.

 

Art. 10

  1. las elecziuns vegnan fatgas cul maun pli.

  2. Per tuttas votaziuns ed elecziuns vala l’emprema gada igl absolut pli, la secunda gada il relativ pli. Tier tscharnas ulivas decida la suprastonza.

 

Art. 11

Las radunonzas dueigien vegnir publicadas ad uras sin moda electronica. Indicar la gliesta da tractandas.

 

Art. 12

La suprastonza secumpona ord: 

  1. President(a)

  2. Vicepresident(a)

  3. Cassier(a)

  4. Actuar(a)

  5. Assessur(a)

 

 

D. OBLIGAZIUN DALLA SUPRASTONZA

 

Art. 13

  1. La/il president/a presidiescha tuttas radunonzas dall’uniun. El/la procura ch’il program da lavur vegni exequius sco protocolau. El/la presidiescha tuttas sesidas dalla suprastonza. El/la ei il prem-representant da noss’uniun.

  2. La/il president/a realisescha ni surdat als commembers dalla suprastonza ni dall’uniun las activitads annualas numnadas sut E. USITS.

 

Art. 14

La/il vicepresident/a substituescha la/il president/a en sias funcziuns.

 

Art. 15

La/il cassier/a administrescha la cassa dall’uniun e renda annualmein quen alla radunonza generala.

 

Art. 16

La/igl actuar/a scriva e prelegia ils protocols.

Art. 17

  • La/igl assessur/a pren part da sesidas d’autras uniuns ed informescha noss’uniun.

  • Anoviars sa el/la remplazzar la/il president/a ni vicepresident/a.

  • El/la ei el medem temps bibliotecari, el/la meina ina gliesta d’inventari e dat giu rapport alla radunonza generala.

 

Art. 18

  • Las/Ils revisurs/as da quen examineschan ils quens digl onn e dattan giu rapport alla radunonza generala.

  • Las elecziuns vegnan menadas entras ils revisurs.

 

Art. 19

Maunca in commember da suprastonza sa la suprastonza eleger en atgna cumpetenza in remplazzament tochen la proxima radunonza generala.

 

Art. 20

Commembers da suprastonza e revisurs da quen ein teni da remetter lur uffeci a scret alla suprastonza in meins avon la radunonza generala ordinaria.

 

Art. 21

  • Mintga commember niev da suprastonza vegn elegius per ina perioda d’uffeci da dus onns e silsuenter mintgamai per in onn.

  • Igl ei buca pusseivel da remplazzar l’entira suprastonza il medem onn. Sil pli pauc in commember vegl sto restar ella suprastonza.

 

 

 

E. USITS

 

Art. 22

  1. S. Clau
    Gl’usit da S. Clau vegn organisaus dall’entira uniun.

  2. Purtar Nossadunna
    Commembers portan Nossadunna a caschun da: 
    – Pardanonza
    – 
    Dumengia dil S. Rusari

  3. Purtar bandiera
    Il bandierel porta la bandiera a caschun da:

    – Sontgilcrest
    – Pardanonza
    – Mortoris da commembers
    – Cumin
    – S. Placi
    Il bandierel vegn elegius a caschun dalla radunonza generala. Sia perioda d’uffeci cuozza pia mintgamai in onn.

  4. Tschupi
    Commembers fan tschupi grond per:
    – Occasiuns da nozzas
    – Mortoris da commembers

  5. Tschupi grond per la baselgia
    Commembers fan tschupi grond per:
    – Dumengi’Alva
    – Pardanonza

  6. Schibettas
    L’uniun da giuventetgna surpren il patrunadi da quels dus usits.

 

 

 

F. PROGRAM DA LAVUR

 

Art. 23

Il program da lavur cumpeglia las suandontas occasiuns:

  1. Occasiuns regularas (mira Art. 22)

  2. Occasiuns excepziunalas: p.ex. scolaziun, referats, discussiuns, teaters, cant, sport, excursiuns, sentupadas, seras da recreaziun, acziuns sozialas da politica e religiusas, manteniment dil lungatg romontsch etc.

 

Art. 24

Commembers han ils suandonts dretgs:

  • Dretg da votar.

  • Dretg da vegnir elegi.

  • Dretg d’iniziar e da separticipar allas acziuns.

 

Art. 24a

Obligaziun da segidar duront occasiuns

Mintga commember ei obligaus da segidar duront las occasiuns dalla uniun. Commembers che san buc prender part ston schar perstgisar tier il president. 

 

 

H. FINANZAS

 

Art. 25

La cassa vegn spisgentada entras suandontas entradas:

  1. Entras bunamanas.

  2. Entras il rincav da differentas acziuns.

  3. Entras ina contribuziun annuala per commember, la quala vegn concludida a caschun dalla radunonza generala.

 

 

 

I. DETERMINAZIUNS FINALAS

 

Art. 26

 L’uniun sa vegnir sligiada sche 3/5 dils commembers decidan quei (fuorma d’iniziativa). En cass dalla disoluziun dall’uniun vegn sia facultad administrada dil gerau dil vischinadi. Seconstituescha enteifer 10 onns ina nov’uniun cun ils intents fixai en Art. 1 daventa quella proprietaria dall’entira facultad. Cass cuntrari curdass la facultad allas uniuns culturalas dil vischinadi.

 

Art. 27

Las statutas presentas van en vigur cun l’approbaziun entras la radunonza generala ed annulleschan las statutas existentas dall’uniun da giuventetgna dils 28 da december 1974.

 

Art. 28

  1. Quellas statutas dueigien vegnir prelegidas schi savens che la suprastonza ni 1/5 dalla radunonza generala anfla per bien.

  2. Singuls commembers san retrer exemplars ni prender investa tier la suprastonza.

 

Art. 29

Las statutas dall’uniun da giuventetgna san vegnir revedidas da tut temps e sin giavisch :

  1. dalla radunonza generala: 2/3 dils presents

  2. en fuorma d’iniziativa: 2/3 da tut ils commembers

 

 

 

J. APPROBAZIUN

 

Questas statutas ein vegnidas prelegidas ed approbadas dalla giuventetgna da Danis-Tavanasa a caschun dalla radunonza generala dils 27 da december 1985.

 

Igl Art. 25 c) ei vegnius currigius ed approbaus a caschun dalla radunonza generala dils 26 da december 1994.

 

Igl Art. 5 d), Art. 22 f), ed igl Art. 25 c) ein vegni currigi ed approbai a caschun dalla radunonza generala dils 26 da december 2004.

 

Igl Art. 4a ed Art. 24° ein vegni aschuntai ed approbai a caschun dalla radunonza generala dils 26 da december 2014.

Igl Art. 24a ei vegnius currigius ed approbaus a caschun dalla radunonza generala dils 26 da december 2017.

Igl Art. 11 ei vegnius currigius ed approbaus a caschun dalla radunonza generala dils 26 da december 2018.

Igl Art. 4a ei vegnius currigius ed approbaus a caschun dalla radunonza generala dils 26 da december 2019.

  • Black Facebook Icon